Mediating Multilingualism
Dis a wan prajek wid Amity University, Haryana, Indian Centres for Endangered Languages, an di Jamiekan Langwij Yuunit/Jamaican Language Unit a The University of the West Indies, Mona.
Di Language Sciences Institute, wid elp fram Soillse an Sabhal Mòr Ostaig, a liid dis-ya prajek ya fi bil op lingks wid dem Indian an Jamiekan paadna dem uu bizi a du risorch bout chatin uol iip a difrent difrent langwij, an langwij we a schrogl fi stie alaiv, aar langwij we piipl naa gi no prapa bakitiv. Ina di fos ier a di prajek, 2018-2019, dem kip wan kanfrens wid nof big skala a Amity University, Haryana, (di tap-a-tap Indian paadna), az paat a wan chrip fi chek out wat a gwaan, an dat did invalv kopl chrip go a di Centres for Endangered Languages we de a Jadavpur University, Kolkata, an Visva-Bharati, Santiniketan. Yu kyan fain di ful stuori wid di lingk dem tu di prizentieshan dem ina di Soillse ripuot.
Ina di sekan ier, wi fuokos pan infamiesha wa wi kalek ina di komyuuniti an wi tes out som nyuu wie fi rekaad an som platfaam we piipl yuuz fi spred elpful infamieshan, an di divelopment a wan lis a tingz wi a-go riisorch we fuokos pan di difrent kandishan ina sosayiti we kaaz chrobl fi langwij. Aafta di karuona vairos tek uova an mash op di worl, wi chienj wi fuokos an wi staat kalek infamiesha pan di intanet, an luk bout ou fi manij da kaina infamieshan de wail wi a wiet. Wi a fuokos pan ou fi fiks op di Clilstore platfaam so it kyan diil wid Indian langwij an raitin sistim. Wi tes out di sistim wid fuor difrent langwij an a get redi fi du muor wok pan dem.
|
Assamese |
Bangla |
Khasi |
Tamil |
|
|
|
|
Ina di tord ier a di prajek, di Jamiekan langwij yuunit get ad aan az wan nyuu paatna. Pan tap a evriting els, di yuunit du risorch pan di Jamiekan langwij an a push fi di akseptans a di langwij, fi govament mek it ofishal, an fi it tiich tu piipl we baan a yaad an abraad. Fi di Jamiekan paat a di prajek, dem a mek aadiyo and vidio matiiriyal ina di Jamiekan langwij, dem a rait dong infamieshan wa dem av pan rekaadin, dem a chransiliet som dakiment, mek wordlis, an pan tap a dat, dem a put tugeda wan 500,000-wod kaapos.
Di Mediating Multilingualism prajek a get sopuot fram di Global Challenges Research Fund.
Dis ya vidiyo ya chat bout di Intanashinal Langwij Festival fi Fos-taim Langwij an Langwij we Nier fi Ded we dem kip a North-Eastern Hill University (NEHU), Shillong, az paat a di 2019 Intanashinal ier fi fos-taim langwij. Di mien langwij ina di flim a Gaelic bot it av iin nof ada langwij an dem rait pan di skriin ina Ingglish aal a wa di piipl dem se. Di mien flim don ina les dan 12 minit, an bifuo it staat, sitn de de we mek yo nuo we i niem an tel yu bout i, an dat tek tuu an a aaf minit. Afta dat don, dem yuuz 6 muor minit fi chat bout di flim an wan shaat endin we gi likl muor infamieshan.